24 Июн 2015
Канон святителю Лазарю исповеднику, архиепископу Одесскому
Егоже краестрочие:
Святителю Христов Лазаре, молитвами твоими сохрани паству.
Глас 4
Песнь 1

Ирмос: Отверзу уста моя, и наполнятся духа, и слово отрыгну Царице Матери, и явлюся светло торжествуя, и воспою радуяся Тоя чудеса.
Припев: Святителю отче Лазаре, моли Бога о нас
Слове Божий, Единородный Сыне Отечь, даждь ми ум, да воспою угодника Твоего святителя Лазаря, иже душу свою за боголюбивую паству положивша.
В горняя умом своим еще издетска воспаривше, земныя прелести отринул еси, о спасении души своея едино попечение имуще.
Яко елень младый ко источникам мудрости духовныя востекл еси, жажду духовную богомудрыми словесы утоляюще. Тленными утехами века сего не пленился еси, в сердце любовь ко Сладшайшему Иисусу носяще, да Его лице в будущей жизни зрети будеши.
Слава: И нравом целомудрен, и смиренномудрием украшен явился еси, добродетелями душу свою напитавше, да плод сторичен принесеши своему Владыце.
И ныне: Твоему велию человеколюбию дивящеся, Пречистая, притекаем к теплому заступлению Твоему, да горькия работы фараоновой избегнем.

Песнь 3

Ирмос: Твоя песнословцы, Богородице, живый и независтный Источниче, лик Себе совокупльшия духовно утверди, в божественней твоей славе венцев славы сподоби.
Егда преподобный Феодосий тебе узре, к нему с кротостию и смирением пришедша, возлюби благоплодие души твоея, под молитвенный покров свой приявше.
Любовию ко Творцу своему горяще, иноческий образ от рук преподобнаго Феодосия восприял еси, да воин Христов явишися.
Юродство преподобнаго Феодосия зряще, познал еси, яко горняя мудрость земнаго суемудрия чужда есть.
Христа Единаго возлюбивше, исповеднический подвиг понесл еси, да венец славы неувядаемой от руки Вседержителевой улучиши.
Слава: Распявше плоть свою со страстьми и похотьми, душу свою страданьми убелил еси, да горняго наслаждения достоин явишися
И ныне: Истинную Церковь Христову омофором Своим покрываеши Владычице, от душетленных волков овцы Христовы защищающе.

Седален, глас 4

Горнюю славу возлюбив, святителю, и в селениях праведных быти вожделев, добре в вертограде Христовом потрудился еси, да верныя ко вратам Царствия Небеснаго преведеши. Еже и нас твоими чадами духовными быти сподоби, Лазарю преблаженный, да помощию твоею вечнаго спасения сподобимся.

Слава : и ныне:

Неопалимая Купина именуешися от нас Пречистыя, яко неопальна пребыла еси вместивше в себе Огнь Божества. Нас же пламени геенскаго избави, молитвами угодника Христова святителя Лазаря.

Песнь 4

Ирмос: Седяй во славе, на Престоле Божества, во облаце легце, прииде Иисус Пребожественный, нетленною дланию, и спасе зовущия: слава, Христе, силе Твоей.
Сергианския прелести отбегше, путем тесным и многоскорбным шествовал еси, Церковь Катакомбную собою украсивше.
Телесныя страсти постом и бдением умертвивше, душу божественною благодатию облагоухал еси, верныя святостию своею озаряюще.
Овцы Христовы расточенныя во едино стадо собрати восхотев, день и нощь многия труды и подвиги понесл еси, да пастырь добрый явишися.
Велие попечение о спасении верных имуще, себе никогдаже пощадил еси, истинную любовь к пастве Христовой показующе.
Слава: Леонтием, святителем Церкви Русския в рассеянии сущей, наставляем, подвиг сугубый понесл еси, о Церкви Катакомбней день и нощь попечение имуще.
И ныне: Аще и согрешаем на всяк день, Пречистая, но имамы Тя теплую Заступницу пред Богом, о грешницех кающихся слезы матерния к Сыну Своему проливающую, да помилует всех молящихся Ти.

Песнь 5

Ирмос: Ужасошася всяческая о божественней славе Твоей: Ты бо, Неискусобрачная Дево, имела еси во утробе над Бога, и родила еси безлетнаго Сына: всем воспевающим Тя мир подавающая.
Зряще Господь благоплодную доброту сердца твоего, пастырем овец Христовых поставит тя, да многия ко спасению приведеши и благочестию наставиши.
Ангельское житие возлюбивши, монашеский чин восприял еси, сугубым подвигом житию преподобных подражая.
Разум богопросвещен имуще, блаженный Макарий Новопсковский в землю Кубанскую стопы направити благослови ти, да и тамо верныя в Истинней вере укрепиши.
Евангельския словеса в сердце начертавше, душу свою за овцы Христовы полагал еси, никогдаже себе не пощадивше.
Слава: Молитвою Иисусовой сердце озаривше, умом в горних пребывал еси, небесною радостию души верных озаряюще, да неленостно ко спасению шествовати будут.
И ныне: О, Премилостивая рода Христианскаго Заступнице, не остави в бедах рабы Твоя, да безпреткновенно молитвы Тебе возносити будем.

Страницы